Hundaþjálfun - Fróðleikur frá Hundaþjálfun.is

2011-08-26T15:02:00.000-07:00

Er með nokkur góð "leyndarmál" hundaþjálfunar sjá HÉR

Vertu með fjölda þeirra hundaeigenda sem langar að gera samband sitt við hundinn betra.

Máttur hugans

2011-08-14T06:24:00.000-07:00

Hérna kemur smá saga.

Ég hitti hjón í Bretlandi fyrir ekki svo löngu síðan sem þurftu hjálp með hundinn sinn, fallega tík blöndu af Labrador og German Pointer. Hundurinn var erfiður í göngu vegna þess að hann fór á eftir hverjum einasta bíl sem keyrði framhjá, rykkti í tauminn og reyndi að stökkva á eftir bílnum, eigendum sínum skiljanlega til mikilla ama.

Hjónin voru ráðalaus, voru farin að kvíða að fara með hundinn í göngu og vissu ekki hvernig hægt væri að laga þetta.

Það allra fyrsta sem ég benti þeim á, er hversu stór partur við erum af lífi hundsins okkar og hvernig hann les í okkur, finnur vel hvernig okkur líður hverja einustu stund sem hann er nálægt okkur. Þannig að ef fólkið fór að kvíða göngunni áður en það fór út fann hundurinn frá þeim veika orku og þannig treysti þeim ekki til þess að vera leiðtogar í göngunni. Úti fengu hjónin alltaf hnút í magann þegar bíll nálgaðst og hundurinn fann það beint í gegnum tauminn og stökk í átt að bílnum.

Það fyrsta sem þau þurftu að sigrast á, er að vera alltaf að hugsa um þetta slæma, því eins og maður hefur upplifað að þá bara gerist það!  Þess í stað bað ég þau að ímynda sér gönguna eins og þau vildu hafa hana og sjá fyrir sér að hundurinn myndi ganga rólega við hliðina á þeim meðan bíll færi framhjá. Ég bað þau að finna hjá sér sjálfstaust og trúa á að hundurinn þeirra gæti vel gengið rólega framhjá bílum.

Við röltum í smástund og hundurinn horfði mikið á bílana, tilbúinn að stökkva.

Allt í einu reisti konan axlirnar, andaði djúpt, gekk rösklega og sagði við mig „jæja, það er að koma bíll og hann skiptir engu máli, við erum bara að ganga hérna yfirveguð og að njóta náttúrunnar“  Og viti menn, hundurin fann það um leið og leit varla á bílinn! Rosalega gaman að sjá svipinn á konunni ,hún átti varla orð. Eins og ég segi þá er máttur hugans mikill.

Hundar þurfa leiðtoga, það er innprentað í þeirra DNA, þeir leita eftir yfirveguðum leiðtoga sem meðhöndlar erfiðar aðstæður með ró og yfirvegun. Þannig geta hundarnir slakað á og notið þess að vera til. Tileinkaðu þér því yfirvegun kringum hundinn þinn og þakkaðu fyrir hann á hverjum degi, ef það eru einhver vandamál í gangi, sjáðu fyrir þér hundinn haga sér öðruvísi, ekki einblína á það slæma, hafðu trú á að hann geti þetta og það er aldrei að vita nema hann komi þér á óvart! :)

Símatímar í júlí !

2011-06-29T05:32:00.000-07:00

Heil og sæl hundafólk!

Eftir dágott frí vegna fjölgunar mannkyns hjá mér er ég komin aftur af stað í bestu vinnu í heimi fyrir utan móðurhlutverkið, að kenna allt það sem ég kann í sambandi við hunda.

Margir hafa haft samband við mig gegnum tíðina vegna hegðunarvandamála hjá hundunum sínum og það er búið að aukast mikið að fólk þurfi aðstoð. Mörgum finnst gott að spjalla við einhvern með reynslu til að fá hjálp eða fá staðfest að verið sé að gera rétt.
Það vera svolítið erfitt að hjálpa öllum sem hafa óskað eftir mér meðan ég er með svona ung börn heima en ég vil endilega hjálpa og hef því ákveðið að bjóða uppá viðtalstíma gegnum síma frá 1.júlí til 1.ágúst.

Fyrir hverja eru símaráðgjöfin?

Sumir þurfa ráðgjöf varðandi eitthvað eitt vandamál, aðrir eru með hvolpa og svo eru margir sem þurfa bara að fá staðfest að verið sé að gera rétt í uppeldi hundsins og hvernig meigi fyrirbyggja vandamál eða fínpússa suma hegðun. Margir hafa fengið aðstoð hjá mér áður og þeim er velkomið að hafa samband ef það er eitthvað. Hvað sem það er þá er um að gera að panta tíma í símaviðtal og fá aðstoð. Sumir eru að hugsa um að fá sér hund eða bæta við öðrum hundi og þurfa ráðleggingar varðandi val og aðlögun. Sumir eru með spurningar varðandi komu barns á heimilið og þjálfun hunda kringum börn. Aðrir eru með spurningar varðandi fóðrun og heilsu hundsins. Hvað sem það er þá er til svar.

Nánar á www.hundatjalfun.is

Börn og hundar

2011-02-08T22:56:00.001-08:00

Vegna þess hversu vinsælt hundahald er orðið víða í heiminum er mikilvægt fyrir alla hundaeigendur að læra um atferli hunda og þjálfun, vegna þess að með því að taka að okkur hund, erum við að taka inn á heimilið dýr með allt aðrar þarfir og langanir en við. Til þess að sambúðin gangi vel þurfum við að taka tillit til þessara þarfa og langana alveg eins og við þurfum að taka tillit til ólíkra þarfa og langana hjá maka okkar en þannig verður til traust og virðing í sambandi.

Þegar börn eru á heimilinu horfa þau á hvernig foreldrarnir umgangast hundinn og læra og herma eftir þeim, því er mikilvægt að vera góð fyrirmynd og kenna börnum rétta umgengni við hunda og kenna þeim að sýna hundum virðingu og skilning. Foreldrar þurfa að skilja að ung börn eiga ekki að vera í ábyrgðarhlutverki þegar kemur að umönnun og þjálfun hundsins heldur er það hlutverk foreldranna, en gott er að láta börnin hjálpa til við marga hluti sem við kemur hundinum eins og til dæmis að taka til matinn, koma með í göngutúra, leika við hundinn svo eitthvað sé nefnt. Það kennir barni ábyrgð og styrkir sambandið milli barnsins og hundsins.

Börn eiga að vera framlenging foreldra sinna þegar kemur að þjálfun og hlýðni hjá hundinum. Þar sem hundar eiga það til að hlýða börnum minna þurfa foreldrarnir að vera til staðar þegar barn segir hundinum skipun eins og til dæmis að setjast eða fara frá. Með því að stíga fram og sjá til þess að hundurinn hlýði þegar barn biður hann um eitthvað lærir hundurinn að sýna barninu virðingu og fara eftir óskum þess, vegna þess að hann veit að foreldrið sér til þess að hundurinn geri það sem barnið biður um. Óskir barnsins mega þó ekki vera óraunhæfar heldur nota skal þær reglur sem settar hafa verið fyrir hundinn og allir eru sammála um, og hvet ég alla til að nota yfirvegun og jákvæðni í þjálfun hundsins og kenna barninu sínu það sama. Það er mjög gefandi og þroskandi fyrir barn að alast upp með hundi en barnið verður að virða hundinn og læra að hundum finnst ekki alltaf gott það sem mannfólkinu finnst gott.

Tökum sem dæmi það að faðma hund. Það að faðma einhvern er merki um væntumþykju hjá okkur mannfólkinu og okkur finnst flestum gott að fá faðmlag. Annað er þó á könnunni hjá hundum. Hundum finnst í lang flestum tilfellum alls ekkert þæginlegt að láta faðma sig. Sumir þola það alveg, gera ekki neitt en það þýðir samt ekki að þeim finnist það þæginlegt. Flestir hundar sýna einhver stressmerki þegar þeir eru faðmaðir en þessi merki fara yfirleitt framhjá fólki sem ekki þekkja nægilega vel inn á atferli hundanna sinna. Sumir hundar eru vanir því að láta nánustu faðma sig en láta svo illa þegar einhver ekki eins kunnugur ætlar að gera það og þá geta komið upp mjög neikvæðar hegðanir hjá hundinum. Eitt af því varasamasta fyrir barn er að alast upp með hundi sem það má gera ýmislegt við án þess að fá viðbrögð eins og til dæmis að kyssa hann og knúsa og ætlar svo að gera það sama við anna hund sem þekkir barnið ekki eins vel, þó að þetta sé hundur ömmunnar eða frændans, þá er alltaf hætta á að hundur taki svona hegðun illa frá þeim sem hann þekkir ekki nægilega vel og býr ekki með. Því er mikilvægt að kenna börnum að virða það að hundar vilja ekki láta knúsa sig né kyssa í framan, að það sé hættulegt að gera það við ókunnuga hunda að vaða aldrei í hunda sem þau þekkja ekki. Gott er að kenna börnum hvað hundum finnst virkilega skemmtilegt, eins og til dæmis að fara í göngutúr, fá klór á bringuna, fá smá hundanammi eða elta bolta. Að kenna börnum að leika rétt við hunda er skynsamlegt og fyrirbyggir misskilning milli barna og hunda og kemur í veg fyrir neikvæða hegðun frá hundinum, sem er oftast bara að biðja um að vera látinn í friði. Sumir hundar eru mjög viðkvæmir og stressaðir við svona aðstæður og geta vanið sig á að urra og glefsa en taka þarf þannig hegðun mjög alvarlega.

Með þessari grein fylgja video, sýnidæmi á ensku þar sem sýnd eru stressmerki hjá hundi sem er faðmaður af barni annarsvegar og þegar hundur er kysstur.

Horfðu á video um faðmlagið hér

Horfðu á video um kossa hér

Ég hvet alla hundaeigendur sem eru með börn inn á heimilinu að vera góð fyrirmynd þegar kemur að uppeldi og þjálfun hundsins og kenna þeim rétta umgengni bæði við hundinn á heimilinu sem og ókunnuga hunda

Með bestu kveðju

Heiðrún Villa
www.hundatjalfun.is

Nóvember

2010-11-11T06:35:00.000-08:00

Kæru hundavinir.

Dýrahjálp Íslands hefur aðstoðað fjölmörg dýr í heimilisleit.
Þau hafa unnið frábæra vinnu og eiga hrós skilið.

Ég hvet alla til að styrkja þau til að geta haldið starfseminni áfram og einnig að skoða
þau heimilislausu dýr sem eru á síðunni.

Bráðlega mun Dýrahjálp opna sölusíðu þar sem þau verða með jólakort og aðrar skemmtilegar vörur til sölu
og hvet ég alla að fylgjast með.

Bestu kveðjur í bili - framundan er uppfærð síða full af fróðleik

Heiðrún Villa
http://www.hundatjalfun.is/

2010-05-27T08:26:00.000-07:00

Góðan dag gott hundafólk.

Mig langar aðeins að fjalla um aðferðir við hundaþjálfun í dag. Eins og í svo mörgu eru til fjölmargar aðferðir við að þjálfa upp hund. Einnig eru til margar aðferðir við að laga hegðunarvandamál hjá hundum. Í gegnum tíðina hef ég haft mikla ástríðu af erfiðum hegðunarvandamálum í hundum og lesið mér mikið til og lært mikið erlendis. Ég hef skoðað allar aðferðir sem ég hef rekist á og margar þeirra hef ég kafað djúpt í til að skilja betur og læra betur. Mér finnst leitt þegar fólk tekur sig til og tekur eina ákveðna aðferð fyrir og útskúfar henni vegna einhvers sem gerði mistök með hana einhverstaðar eða vegna þess að það hefur ekki kynnt sér aðferðina til hlýtar. Telur sig hafa bestu aðferðina á alla hunda. Ég hef rekist svolítið á þetta gegnum tíðina og þetta hefur fengið mig til að hugsa.

Er einhver aðferð best?

Svar mitt og mitt álit við þeirri spurningu er einfaldlega nei.

Það er engin aðferð best. Er það ekki í svo mörgu?

Það fer algerlega eftir hundi og eiganda hvaða aðferð er árangursríkust. Hundar eru misjafnir og þurfa misjafna nálgun sérstaklega þegar laga þarf hegðunarvanamál, þó að nálgunin eigi alltaf að vera jákvæð.Þessvegna hef ég lært allar þessar aðferðir. Til þess að nota allt það góða úr þeim öllum saman í áhrifaríka ráðgjöf fyrir hvern og einn. Persónulega ráðgjöf þar sem hver hundur er metinn eins og hann er og ráðleggingarnar ákveðnar eftir því. Ég ráðlegg fólki alltaf að læra eins mikið og það kemst í og fara á eins mörg námskeið og hægt er, og nota síðan það sem það finnst virka fyrir sig.

Það er þó eitt sem ég tel skipta öllu máli í sambandi við hundaþjálfun. Það þarf aldrei að takast á við vandann með ofbeldi eða ógnun við hundinn. Í flestum tilfellum þarf ekki einu sinni að koma við hann til að laga erfitt hegðunarvandamál. Jákvæð styrking og styrking leiðtogahlutverksins er það sem mér finnst hafa virkað fyrir mig og þá fjölmörgu sem ég hef aðstoðað.
Hundarnir eru hér til að kenna okkur jákvæðni, yfirvegun og hreinskilni. Þeir eru hérna til að þroska okkur. Látum þá minna okkur á alla þá yndislegu hluti sem við eigum til með að gleyma að horfa á.

Kær kveðja
Heiðrún Villa

Eitt af því fjölmörgu sem hundar kenna okkur

2010-05-14T06:56:00.000-07:00

Góðan dag gott fólk

Ég hef mikla trú á því að hundar eru komnir til okkar til að kenna okkur ýmsa hluti. Einn af þeim hlutum sem þeir geta kennt okkur er að læra að sýna yfirvegun í krefjandi og stressandi aðstæðum. Úti í hinni viltri náttúru stjórnast flokkur úlfa eða villihunda af foringja sem sér um að taka ákvarðanirnar og að vernda flokkinn. Sá foringi er ákveðinn með sínar reglur og stendur við þær, en leiðréttir ekki með því að missa stjórn á skapi sínu. Hann sýnir ákveðni en yfirvegun og þess vegna virða og treysta meðlimir flokksins honum sem foringja.

Þrátt fyrir að hundar séu farnir að alast upp með manninum breytir það ekki þeirra eðli. Þeir þurfa að hafa foringja í sínum flokki og vilja hafa einhvern sem þeir treysta og virða. Ef manneskjurnar sem hundurinn býr með eru ekki í jafnvægi, og missa stjórn á skapi sínu við hundinn er líklegra að hann reyni að stjórna ákveðnum aðstæðum sjálfur, í stað þess að láta manneskjuna um það. Einnig geta hundar alveg hlýtt manneskjum sem nota öskur og ógnir á hundinn en er ekki betra að hundurinn hlýði vegna þess að hann treystir manni og virðir, ekki vegna þess að hann er hræddur við mann?

Á mínum 12 ára hundaþjálfunarferli hef ég séð margar breytingar verða einungis vegna þess að eigandi hundsins fór að temja sér yfirvegun í þeim aðstæðum sem hann vildi að hundurinn hagaði sér betur. Í stað þess að ýkja upp aðstæðurnar fyrir hundinn þá róaði manneskjan aðstæðurnar niður með þvi að vera róleg sjálf og þá gekk allt miklu betur og hundurinn fór að treysta manneskjunni að sjá um aðstæðurnar og gat slakað á í þeim. Trúið mér þetta krefst oft æfingar, ég hef alveg reynslu af því sjálf í gamla daga áður en ég fór að læra þá tækni sem ég kann í dag að skamma hundinn minn og gera þannig aðstæðurnar miklu verri. Það frábæra finnst mér að þegar ég fór að ná yfirvegun með hundunum mínum þá fór ég að ná yfirvegun í mörgum óvæntum aðstæðum í lífinu. Eitt af fjölmörgum dæmum um það var þegar ég lendi eitt sinn næstum því í árekstri. Jeppinn sem ég var á rann verulega til á veginum og stefndi á nokkra bíla. Venjulega hefði ég frosið eða misst mig í einhverju óðagoti en vegna þess að ég var búin að venja mig á að taka stressandi aðstæðum með yfirvegun gat ég verið alveg róleg og beygt frá á réttum tíma til að forðast áreksturinn. Þetta þakka ég hundunum mínum fyrir.

Stundum er gott að fá fagmann með sér til að læra að tækla ýmsar aðstæður sem er að valda stressi. Þá sér fólk hvað er rétt að gera og heldur sig við það og fær flottan árangur.

Ég er tilbúin að hjálpa hverjum sem er við hvað sem er varðandi hundinn því ég er komin hingað ekki bara til að hjálpa fólki með hundana sína, heldur að hjálpa hundunum að kenna fólkinu það sem þeir eru komnir til að kennaJ

Ég verð í Reykjavík 28.-30. maí og kem svo aftur í júní. Aðra áfangastaði er ég að skipuleggja læt vita um leið og ég hef fest þá niður.

Ég vona að þið eigið góða helgi og endilega prufið þið að æfa þær aðstæður með hundinum sem hafa verið stressandi með ró og yfirvegun.

Góða helgi

Heiðrún Villa

www.hundatjalfun.is

Fróðleikur aprílmánaðar

2010-04-07T07:57:00.000-07:00

( Hægt er að skrá sig á http://www.hundatjalfun.is/ og fá reglulega sendan frían fróðleik)

Góðan dag kæru vinir.

Það er búið að vera fallegt vetrarveður svona rétt áður en vorið dettur inn og hérna fyrir norðan er snjónum búið að kyngja niður, fullkomið færi fyrir skíðamenn í fjallinu.
En ég ætla ekki að tala um skíði, heldur langar mig að tala aðeins um göngutúrana sem við tökum hundana okkar í.

Þegar við erum í göngutúr, eigum við það oft til að horfa mestmegnis niður á við, sjáum skóna okkar í takt þegar við erum að ganga og störum í malbikið, mölina, grasið eða snjóinn. Í göngunni erum við að hugsa um daginn í gær eða daginn á morgun, eða hvað sé framundan í dag, við höfum áhyggjur af ógreiddum reikningum og okkur finnst við kannski frekar eiga að vera að gera eitthvað annað en að vera úti á labbinu eins og að laga til eða versla það sem vantar í ísskápinn.
Hvernig væri það að venja sig á að þegar maður fer með hundinn í göngu, hvort sem það er niður í miðbæ eða utar þar maður kemst í meiri náttúru, að líta aðeins upp, anda djúpt og horfa á allt það fallega í umhverfinu. Það getur verið tré, fallegt hús, fjöllin, sjórinn, krakkar að leika sér eða hvað sem er. Njóta þess að horfa á þessa fegurð og láta hugann slaka á og hugsa hvað er í gangi hér og nú. Þetta er mjög góð æfing til þess að kyrra hugann og hlaða batteríin. Ef maður gerir þetta reglulega verður þetta að góðum vana. Hundurinn er með þér í þessu, finnur þig slaka betur á, gleðst með þér yfir fegurðinni og nýtur þess að vera til hér og nú.
Það er margt sem við getum lært af hundinum okkar, og eitt af því er að njóta umhverfisins og láta okkur líða vel í þeirri stund sem er að líða. Einblína ekki of mikið á það sem liðið er og vera stöðugt að hugsa til framtíðar. Líða vel í þeirri stund sem skiptir mestu máli. Núna.

Með góðri kveðju
Heiðrún Villa
http://www.hundatjalfun.is/

Janúar - febrúar

2010-01-30T11:05:00.000-08:00

Það er margt skemmtilegt búið að gerast síðustu vikur. Hundarnir sem ég hef verið með í sérmeðferðum hafa sýnt mikla framför og geta núna umgengist aðra hunda án erfiðleika. Mjög gaman að sjá svona árangur. Sómi minn hefur unnið mikið og gott verk, stundum hjálpa hundar öðrum hundum fljótar og betur en menn geta gert.

Það er búið að vera margt í gangi eins og námskeið, sérmeðferðir og hittingar og um að gera að halda því áfram, hundum fer ört fjölgandi og æ fleiri leita sér hjálpar með hundinn sinn sem er flott mál! Um að gera að fá aðstoð og þannig fá það besta útúr hundinum sínum.

Framundan eru miklar framkvæmdir stórra drauma! Það er allt hægt ef maður vill og vinnur að því.

Meira um verkefnin framundan í næstu færslu.

kveðja

Markmiðið á næstunni.

2009-12-19T05:39:00.000-08:00

Það hefur verið mikið um það að fólk þurfi hjálp við að venja hundana sína við aðra hunda. Það er alveg eðlilegt, það geta allir hundar orðið erfiðir og andfélagslegir við aðra hunda. Sumir eru líka yfirráðasamir frá náttúrunnar hendi. Það að eiga hund sem getur verið kringum alla hunda er vinna og það þarf að halda svoleiðis hundi við svo hann "ryðgi" ekki.

Skvísa sem hefur verið í smá prógrami sýnir mikla framför. Hún er ekki eins vör um sig þegar hundur nálgast heldur komin með sjálfstraust til að þefa og leyfa hinum hundum að þefa af sér. Það mun taka tíma og meiri æfingu áður en hún verður orðin alveg góð með öðrum hundum, hún gæti samt dottið í gamla gírinn en það er á ábyrgð eigandans að hjálpa henni að gleyma honum.

Nú erum við með annan hund sem hegðar sér eins, hann er jafnvel ákafari í að rjúka í aðra hunda vegna hræðslu, ef hundur nálgast hann urrar hann (Hann heitir Svali sem við ætlum að hjálpa)og ef ókunnugi hundurinn kemur nær stekkur Svali til og glefsar. Þetta ætlum við að hjálpa honum með. Það tekur tíma og vinnu, sumir daga munu ganga vel aðra daga kemur kannski bakslag, en með hverjum tíma sér maður árangur.
Markmiðið er að koma svo Skvísu og Svala saman til að leika. Það er ekki hægt alveg strax, Svali þarf smá prógram áður og æfingu. Það er mjög gefandi og skemmtilegt að sjá áður andfélagslegan hund sem var hræddur og skalf kringum aðra hunda leika sér við fullt af hundum, og vera hundur eins og hundur á að vera:)

Vonandi hafið þið það gott um hátíðarnar og munið að gefa hundinum ykkar góða jólagjöf, eins og góðan göngutúr, lausahlaup á öruggu svæði eða eitthvað þessháttar sem gleður hann sem hund:)

kveðja

Skvísa fær aðstoð

2009-10-31T11:26:00.000-07:00

Þegar tekist er á við vandamál eins og þegar hundur á erfitt með að vera með öðrum hundum er gott að láta hann hitta aðra hunda. En þeir hundar sem hann hittir verða að vera stabílir og bregðast lítið sem ekkert við ef sá hundur sem er verið að hjálpa lætur illa. Einnig verður einhver að vera tilbúinn til að leiðrétta hundana á réttan hátt til að allt gangi vel. Þessvegna er gott að fá fagmann í þetta vegna þess að annars getur allt farið í háaloft.
Fyrst um sinn hitti Skvísa Sóma, og þar sem Sómi er hundur sem bregst ekkert við látum eða óöryggi þá var Skvísa fljót að taka hann í sátt og fóru þau meiraðsegja að leika sér. Hundar hjálpa öðrum hundum oft fljótar en menn. Markmiðið er að láta þau hittast nokkrum sinnum og bæta svo í hópinn. Æfa síðan Skvísu við aðrar aðstæður með öðrum hundum. En fyrst að auka öryggið og félagshæfni hennar og þannig fá hana til að hætta að bregðast illa við þegar hún hittir aðra hunda. Segi meira frá síðar...

Skvísa

2009-10-16T14:24:00.000-07:00

Skvísa er mjög fallegur blendingur af Springer spaniel og Labrador. Eigandi hennar hafði samband við mig vegna hegðunarvanda sem hún er með. Málið er að hún höndlar illa aðra hunda og bregst alltaf við með urri og glefsi að þeim þegar þeir koma nálægt. Eftir að hafa hitt hana sá ég að hún er mjög óörugg kringum aðra hunda og hefur vanið sig á þessa hegðun því hún hefur komist upp með það og ekki kennt annað. Ég sá að það þyrfti smá tíma og vinnu til að ná þessu úr henni en eitthvað sem er vel hægt.

Fylgist með hvernig ég tækla þetta vandamál en fyrsti tíminn er eftir nokkra daga.

kveðja

Úlfur kominn með heimili

2009-10-16T14:21:00.000-07:00

Úlfur fékk frábært heimili hjá góðu fólki og það gengur mjög vel með hann. Flottur hundur þarna á ferðinni og það verður gaman að fylgjast með honum. Sómi og hann voru orðnir mjög góðir vinir og það var flott að Úlfur fór ekki langt þannig að þeir hittast aftur.

Úlfur

2009-10-02T10:33:00.000-07:00

Úlfur er 6 mánaða íslenskur/bc blendingur sem átti að aflífa vegna flutninga en ég tók hann heim.
Hann var hjá mér í nokkrar vikur, mikill gleðipinni. Hann er rosalega hlýðinn og þæginlegur, geltir lítið og rosa fínn með öðrum hundum. Hann fór með mér í eina hundamætingaræfingu og stóð sig vel. Hann tengdi æsing við fólk og snertingu þannig að ég vandi hann aðseins á að vera rólegan kringum fólk og setjast fyrir klapp en hann vill allt fyrir mann gera. Sómi og Úlfur urðu strax miklir vinir og léku sér klukkutímum saman útí garði. Ég byrjaði aðeins að búrvenja Úlf og gekk það mjög vel. Þegar ég er með marga hunda verð ég að búrvenja sérstaklega þá yngri annars er bara partý allar nætur:) En ég passa að búr sé jákvætt og að hundarnir líti á það sem bæli sitt og öryggisstað. Ég vandi Úlf við hjól og honum fannst mjög gaman að hjóla með mér og fórum við líka í margar fjallaferðir. Mjög efnilegur hvolpur og ég sá strax að hann myndi henta vel á heimili með börnum því hann er mjög blíðlindur og geðgóður við bæði dýr og menn.
Núna er Úlfur í „prufu“ hjá frábærri fjölskyldu sem eru dugleg að hreyfa hann og kenna honum allskyns hlýðni. Hann vekur líka mikla lukku hjá krökkunum. Það hefur gengið vel og ég vona að þau vilji taka hann að sér. Mér finnst gott að setja hund í prufu í viku til tvær vegna þess að þá eru meiri líkur á að hundurinn sé á framtíðarheimili þegar fólk hefur ákveðið eftir þennan tíma að taka hundinn. Held að ég fái endanlegt svar eftir helgina:) Vona það besta

Smá fréttir af Pjakk

2009-09-08T09:29:00.000-07:00

Hræðslan fer minnkandi hjá honum og er hann farinn að labba um bæinn með meira sjálfstraust en áður og hann er hægt og rólega að koma betur og betur úr skelinni sem er bara frábært mál.

Lykilatriði er að hreyfa hann vel áður en maður setur hann í aðstæður eins og að labba í miðbænum því þá nær hann að slaka betur á og heilinn fer síður í þennan hræðsluham.
Næst á dagskrá hjá okkur er að vinna betur í nánasta umhverfi hans, sem er rétt fyrir utan Akureyri, því hann á það til að gelta á bíla sem nálgast húsið hans og fólk sem röltir í kring. Það mun ég gera með að hreyfa hann vel, taka langan göngutúr um hverfið, hjóla eða setja hann á hlaupabrettið og reyna síðan að framkalla þau hljóð sem hann geltir á og leiðrétta þá hegðun, m.a. að fá einhvern til að keyra inn í innkeyrsluna, labba framhjá húsinu ofl.

Pjakkur er búinn að vera duglegur að hjálpa öðrum hundum sem eiga við einhvern vandamál að stríða. Sem dæmi má nefna að um daginn notuðum við hann til að aðstoða 2 chihuahua sem geltu á aðra hunda og stóð Pjakkur sig eins og hetja og gerði allt sem hann átti að gera, enda er hann mjög góður með öðrum hundum.
Meira síðar..

Píla

2009-08-08T15:42:00.000-07:00

Píla kom til mín þann 6.ágúst. Hún er ársgömul labrador/border collie blanda og var auglýst inn á Dýrahjálp (http://www.dyrahjalp.is/) Eigendur hennar gátu ekki átt hana lengur vegna óviðráðanlegra aðstæðna og ég ákvað að bjóða mig fram sem fósturheimili.

Markmið mitt með Pílu er að þjálfa hana vel upp, veita henni það sem hún þarfnast og kenna henni almenna hlýðni. Þá verður hún betur í stakk búin að fara inn á framtíðarheimili. Mig langar að fjalla aðeins um það sem ég mun bralla með henni og hvernig ég kenni henni reglurnar mínar.

Nú er hún búin að vera í 2 daga og aðlagast vel. Hún og Sómi eru góðir vinir, á sama aldri líka og því fínustu leikfélagar. Það sem ég vil laga næstu vikurnar hjá Pílu:

Hún er ung og orkumikil og því stutt í æsing og ærslagang, ég ætla mér að gefa henni góða daglega hreyfingu og kenna henni svo yfirvegun því hundum líður betur yfirveguðum en æstum og öll þjálfun gengur betur þannig.

Hún flaðrar og hoppar upp með framfæturnar á borð og annað, með því að hreyfa hana verður hún rólegri fyrir vikið og ég ætla mér að vera dugleg að leiðrétta hana með flaðrið.

Henni líður ekki allt of vel í búrinu sínu sem hún hefur átt frá upphafi, en ég kýs að láta hunda sofa í búri á nóttunni, sérstaklega þegar ég er með unga hunda og fleiri en einn. Hef lent í því að vakna um hánótt og bara leikur og gaman hjá mínum haha:)

Því er ég strax farin að vinna í því að breyta hennar hugsun varðandi búrið, ég vil að hún sjái það sem bæli og öryggisstað en ekki stað sem hún er föst á.

Þegar hún er vel hreyfð gef ég henni skipun að fara í búrið sem ég hef nálægt mér til að byrja með og bið hana að leggjast þar en loka ekki hurðinni! Ég hef trú á því að það sé mikilvægt þegar maður er að búrvenja að loka ekki búrhurðinni á annað en yfirvegaðan og rólegan hug. Því verð ég að æfa það hjá Pílu. Þegar hún hefur komið sér vel fyrir í búrinu og slakar á þá er gott að loka hurðinni og opna svo aftur eftir smá tíma.

Hún er svolítið vælin sem gæti verið vegna þess að hún er uppfull af orku eða vegna þess að hún er einfaldlega búin að venja sig á það. Hreyfing og að hundsa virkar vel á þetta.

Hún togar svolítið í göngutúrum. Oft þegar ég fæ hunda sem toga þá finnst mér stundum eins og þeir séu orðnir ónæmir fyrir þrýstingnum á hálsinn og láta sér fátt um finnast þó þrengist að. Stundum ná þeir fljótt hælgöngunni en ég ákvað í Pílu tilfelli að kynna hana fyrir Halti taum, sem er gangtaumur sem venur hundinn mjög fljótt við hæl án nokkurns þrýsting eða hættu á skemmdum í hálsi. Oft nota ég Halti bara tímabundið meðan hundurinn er að venjast við að ganga við hæl og þarf hann svo ekki lengur. Píla var 10 mínotur að venjast og þetta gekk allt vonum framar. Fékk nammi, hrós og lausahlaup í verðlaun eftir á.

Hún er pínu óumhverfisvanin, en er fljót að aðlagast. Getur líka verið smá stress í henni að koma svona á nýjan stað, en ég fór með hana niður í bæ til að láta hana sjá fullt af fólki og hlutum. Henni fannst margt skrítið en jafnaði sig fljótt. Hún hundsaði að mestu hunda og annað fólk sem er mjög gott.

Ég fór með hana uppá Dýraspítala og sýndi henni kött þar sem er hundvaninn og það gekk mjög vel. Mér finnst rosa gott að prufa hundana við öllu þegar ég fæ þá í hendurnar til að sjá hvað þarf að vinna í.

Hún er svolítið frek á dótið sitt en eftir korters æfingu úti í garði var hún farin að fatta mig og sleppti dótinu og fékk hrós fyrir. Smá æfing í viðbót og þetta verður glimrandi hjá henni.

Þetta er það sem mér dettur í hug í bili, Píla er mjög geðgóður hundur og ekki til illt í henni. Hún er smá klaufi og vantar meiri visku og þjálfun. Þetta kemur allt með tíma, jákvæðni og þolinmæði.

Mynd: (Píla skilur ekkert af hverju hún má ekki koma úr garðinum til mín:)

Pjakkur -3-

2009-08-08T15:29:00.000-07:00

Matti er búinn að vera mjög duglegur með Pjakk síðustu daga.

Ein af "fóbíum" Pjakks var að ganga yfir holræsislok. Í upphafi fékkst hann ekki til þess. Í endurhæfingu eins og þessari er markmiðið að kenna hundinum að finnast hlutir eins og þessir bara sjálfsagt mál. Matti gerði því nokkrar æfingar með Pjakk samhliða prógraminu sem hann er með hann í og Pjakkur er farin að hundsa meira og meira svona lok sem er góðs viti, hann er snöggur að læra kallinn.
Matta finnst nauðsynlegt að fara með Pjakk fyrst á hundasvæðið og láta hann hlaupa og hreyfa sig áður en hann fer með hann niður í bæ, því þá er hann búinn að losa sig við alla auka orku og slakar því fljótt á kringum allt áreitið og sýnir forvitni sem er gott.

Í upphafi lokaðist Pjakkur af hræðslu niður í bæ og vildi ekki einu sinni nammi. Í dag er hann farinn að nota nefið meira og skoða sig um og þefa. Matti hefur verið duglegur að venja hann vel við hæl en í ferð eins og þessari hefur hann Pjakk í flexi taum og leyfir honum aðeins að ráfa um og skoða í kringum sig. Það gengur mjög vel.

Matti er líka duglegur að láta hann sitja og liggja í miðbænum og horfa á allt og alla, Matti nuddar hann jafnvel og þá slakar hann vel á, finnst mjög gott að fá smá nudd:)

Matti er mjög bjartsýnn á framhaldið, þetta þarf þónokkra vinnu í viðbót en það að endurhæfa mjög óöruggan hund getur tekið nokkra mánuði jafnvel meira. Pjakkur er orðinn rosalega fínn með öðrum hundum en fyst lét hann mjög illa með þeim. Nú getur Pjakkur hjálpað öðrum hundum að læra að umgangast aðra sem er frábært! Enda er mjög gott geðslagið í þessum hundi. Við erum mjög ánægð með hann og manni er farið að þykja mjög vænt um þennan hræðslupúka:)
meira seinna;)

2009-08-02T08:48:00.001-07:00

Veistu um hund sem þarf hjálp?

Ef þú vest um hund sem þarf hjálp endilega hafðu samband gegnum email hundatjalfun@gmail.com

Sómi hjálparhella

Pjakkur -2-

2009-08-02T08:32:00.000-07:00

Mynd: Sómi til vinstri og Pjakkur til hægri, á myndinni má sjá muninn á yfirveguðum hundi og óöruggum.

Ég og Matti fórum með Pjakk og eiganda hans í göngu fyrir stuttu að æfa það að mæta öðru fólki sem var á röltinu nálægt heimili hans, en hann hefur hingað til brugðist illa við því. Sérstaklega ef fólkið er með hatt eða eitthvað sem honum finnst skrítið. Matti og eigandinn löbbuðu með Pjakk og Sóma en ég fór á undan með teppi og regnhlíf og var manneskjan sem þau mættu.

Fyrst setti ég á mig hettu, lét hettuna hylja mest allt andlitið og mætti þeim þannig. Pjakkur gelti en Matti leiðrétti og lét hann slaka á. Endurtókum þetta og það gekk vel. Því næst vafði ég teppi um mig og lét það flaksast í vindinum. Pjakkur horfði mikið á mig en gelti ekki og gekk áfram. FLOTT. Því næst var ég með regnhlíf, sennilega eitthvað sem Pjakkur hafði ekki séð áður. Hann starði á þennan furðulega hlut en þetta gekk allt vonum framar. Með æfingunni slakar Pjakkur betur á og hættir að spá svona mikið í því sem hann mætir. Í svona æfingum skiptir mestu að hundurinn er í höndunum á einhverjum sem hann treystir að taki þær ákvörðunartökur sem þarf að taka í staðinn fyrir að gera það sjálfur. Hann þarf að hafa yfirvegaðan foringja. Matti er tilvalinn í svona verkefni enda mikið foringjaefni.

Síðan fórum við inn og tókum aðeins á geltinu þegar heyrist í bíl keyra að og þegar dyrabjallan hringdi og með nokkrum endurtekningum var hann hættur að gelta. En svona æfingar þarf að endurtaka þangað til hundurinn finnst þessi hljóð ekki merkileg lengur.
Núna yfir verslunarmannahelgina var mikið af fólki á kreiki. Matti nýtti sér það og fór með Pjakk niður í bæ þar sem var svið með fullt að tónlist og mikið af fólki. Sómi kom með til að auðvelda Pjakki að aðlagast og gekk rosa vel. Þegar fólk og krakkar spurðu hvort þau máttu klappa var sagt að það væri í lagi að klappa Sóma en ekki Pjakk og það gekk mjög vel. Pjakkur var þónokkuð stressaður til að byrja með sem er eðlilegt, enda mikið áreiti yfir þessa daga en hann náði svo að slaka á.Matti fór líka með hann áður en hann fór niður í bæ og lét hann hlaupa á hundasvæðinu og losa sig við alla auka orku sem hjálpar alltaf. Við röltum fram og til baka um bæinn og vorum mjög sátt við árangurinn. Þegar maður hugsar til baka sér maður mjög miklar framfarir hjá Pjakk. Hann lenti á góðu heimili þar sem eigendurnir hafa mikin vilja til að hjálpa honum en það skiptir öllu þegar hundur er í endurhæfingu.

Pjakkur

2009-07-30T16:33:00.000-07:00

Pjakkur er 2 ára Border Collie/Labrador blendingur sem kom inná gott heimili á Akureyri fyrir nokkrum mánuðum síðan í gegnum Dýrahjálp (http://www.dyrahjalp.is/)
Það kom fljótt í ljós að Pjakkur var lítið sem ekkert umhverfisvaninn, mjög stressaður og hræddur við ókunnuga og hin ýmsu hljóð, svo mikið að hann missti oft þvag. Hann æstist upp þegar hann sá aðra hunda, skalf af hræðslu þegar ókunnugur kom í heimsókn og gelti á fólk úti ásamt öllu því sem honum þótti skrítið og nýtt.
Þegar ég kom á heimilið og hitti Pjakk í fyrsta skiptð sá ég hversu mikið óöryggið og hræðslan var. Það þrufti þónokkurn tíma til þess að fá hann til að þefa af mér og borða nammi úr lófa mínum. Ég hundsaði hann alveg til að byrja með og það lagði góðann grunn að hann gæti slakað á nálægt mér. Um leið og ég prufaði að labba í átt að honum forðaði hann sér og var ein taugahrúga. Þegar hundur er í þessu hugarástandi líður honum mjög illa.

Ég gaf eigendunum ráð til þess að koma Pjakk í meira jafnvægi, fá hann til að slaka meira á og venja hann við það sem hann var hræddur við, ég ráðlagði þeim umfangsmikla umhverfisþjálfun úti þar sem hann fengi að upplifa allskyns hljóð og sjá allskyns fólk og hluti. Ég lagði áheirslu á að ókunnugir hundsuðu hann og hann fengi að koma til þeirra og þefa og yrði annars hundsaður.

Mikið er búið að vinna með Pjakk og í dag hefur margt breyst. Eigendur hans eru rosalega viljug og dugleg að laga það sem þarf að laga og hann er mjög heppin að hafa lent hjá þeim. Eigendurnir fengu Matta til þess að hjálpa við að umhverfisþjálfa og Matti fór reglulega með hann niður í bæ og lét hann mæta allskyns fólki og heyra hin ýmsu hljóð og ganga með öðrum hundum. Það hefur skilað miklum árangri og gaman að sjá muninn á honum eins og hann var og eins og hann er í dag. Hann er enn smá smeykur, en ekki nærri því eins mikið og fyrst.

Sómi einn af mínum hundum hefur hjálpað mikið til, hann er vanur öllu og mjög yfirvegaður hundur. Hann hefur góð áhrif á Pjakk og labbar Matti þessvegna oft með þá saman og þá slakar Pjakkur vel á. Sómi er heldur ekki að kippa sér upp við neitt nýtt og því hefur það góð áhrif á Pjakk.
Einnig hefur Pjakkur verið að mæta á skipulagða hundahittinga sem ég er með. Fyrst var Pjakkur mjög óöruggur og gelti mikið kringum aðra hunda en það er allt önnur saga í dag. Í dag kippir Pjakkur sér sjaldan upp við ef hundar eru eða láta illa nálægt honum. Þannig að umgengni við aðra hunda er allt önnur. Á hundasvæði er Pjakkur til fyrirmyndar og þá sér maður ánægðan yfirvegaðan hund sem elskar að hlaupa og kanna umhverfið. Hann og Sómi eru miklir vinir og það er gaman að sjá þá saman.
Núna erum við að snúa okkur að næsta lið í endurhæfingu Pjakks. Það er óöryggi og gelt í og nálægt húsinu og gelt að fólki sem labbar þar nálægt. Við tókum góða æfingu í gær og í dag og gekk það vonum framar og Pjakkur er fljótur að læra. Nú er bara að endurtaka æfingarnar því endurtekningar eru mikilvægar í þónokkurn tíma til að fá Pjakk í rétta hegðun.

Myndir koma fljótlega og frekari uppfærsla af endurhæfingu Pjakks.

Velkomin

2009-07-30T16:25:00.000-07:00

Velkomin á síðuna. Hér mun verða upplýsingar um hunda í endurhæfingu og hunda sem þurfa annað heimili. Þessi síða er í samvinnu við www.dyrahjalp.is